Квантнохемиска анализа на милениумската молекула Y₂K

На сите ни е познато колкава врева се створи на крајот од минатата година, колку пари и време беа потрошени на предупредувањата и заштитата од можните штети од Y2K-милениумската бубачка. Во тој период двајцата професори Jeffrey Roberts и Christopher Cramer од Универзитетот во Минесота забележале дека не постојат литературни податоци за „сезонската молекула“ составена од два атоми итриум и еден атом калиум.

Истражувачите, мудро, веднаш започнале детална квантнохемиска анализа на Y₂K молекулата. Резултатите од таа работата се публикувани во списанието Science од 17 декември 1999 година.

„Немавме никакви проблеми со компјутерите во текот на анализата на Y₂K“ вели Roberts. Тој исто така вели дека во план е да се анализира и молекулата „зошто не“ со хемиска формула YNOT (итриум, азот, кислород и трициум-радиоактивен изотоп на водородот).

„Имавме намера да ја анализираме и Y₃K молекулата, но сметаме дека за тоа е сe уште рано” велат Roberts и Cramer.

За да ги проверат своите претпоставки за можното постоење на молекула изградена од два атома итриум и еден калиум, биле користени компјутерите на Minnesota Supercomputer Institute. „Анализите покажуваат дека може да постојат два изомера линеарен (Y-Y-K) и Т-облик“ велат авторите.

Не бил направен обид да се предвидат својствата на супстанцата во цврста фаза, а со тоа оставена е отворена можноста оваа молекула некогаш да биде користена за изработка на компјутерски чипови. Авторите сметаат дека супстанцата не би предизвикала проблем доколку се најде во компјутер. Опасноста за компјутерот е поголема доколку врз него се истури кафе, поради тенденцијата калиумот да реагира со вода.

На крај деканот и раководителот на компјутерскиот центар биле известени дека за анализата биле потрошени само 12 часа суперкомпјутерско време и дека не е забележано никакво оштетување на системотод милениумската молекула.

Очекуваме Roberts и Cramer во скоро време да ги публикуваат резултатите од анализата на молекулата YNOT, зошто не, но останува нејасно дали за анализан на Y₃K ке мора да почекаме уште илјада години.