Прочистување на дизел моторите со уреа

Уреата би можела да претставува клучен елемент за прочистување на издувните гасови во Европската Унија (ЕУ) со оглед на новите регулативи кои пред некој месец стапија на сила.

ЕУ бара емисијата на азотните оксиди да биде редуцирана за 30% кај камионите и за 50% кај дизел автомобилите. До 2008 година и во ЕУ и во САД регулативите се очекува да бидат многу построги.

Ingemar Odenbrand

Емисијата на азотните оксиди од тешките камиони претставува 40% од вкупната емисија на овој полутант во сообраќајот и претставува голем проблем за животната средина. Каталитичките конвертори ги прочистуваат издувните гасови од бензинските мотори во голема мерка, но дизел моторите претставуваа голем проблем. Но не повеќе! Истражувачите од Lund University се обиделе проблемот да го решат со уреа - краен производ на метаболизмот на протеините кој претставува дел од урината. Научниците демонстрирале како инјектирањето на оваа супстанца во системот за издувни гасови, при поминувањето низ каталитичкиот конвертор, ја иницира реакција на прочистување на гасовите.

Ingemar Odenbrand од Lund University вели: „Уреата се претвора во амонијак, а ова ги редуцира азотните оксиди под ниво кое може да се смета за штетно, но исто така ги редуцира и содржините на други штетни супстанци кои се наоѓаат во ниски концентрации во горивото, како што се цврсти честички, саѓи, јаглен и јаглеводороди“

Тимот на Odenbrand соработувал со Volvo, Scania, со производителот на каталитички конвертори Johnson Matthey, како и со Chalmers Institute of Technology од Göteborg во развојот на методата за складирање на азотните оксиди со што емисијата би можело и натаму да се намалува. Методата се состои во складирање на азотните оксиди во каталитичкиот конвертор и нивно намалување со инјекција на јаглеводороди (дизел гориво) секој 60 или 90 секунди. Јаглеводородите при ова се разложуваат до јаглерод моноксид, кој потоа ги редуцира азотните оксиди до елементарен азот. „Во експериментите кои ги изведовме успеавме да ја редуцираме емисијата на азотните оксиди од 7 g/kWh na 3 g/kWh“ вели Odenbrand.

Изведувајќи ги екепериментите во реални услови истражувачите се обидуваат со промена на температурата, протокот и други параметри кои влијаат на овие процеси да се обидат да ги намалат количествата на азотните оксиди за 94% од сегашните. До 2008 година се очекува ЕУ да го намали издвоеното количество на азотни оксиди на 2 g/kWh од постојните 3,5 g/kWh.